在全世界都期待阿爺直接向股市灑水成效之際，整個救股行動由中證監一句「在一般情況下國家隊不會再入市」下結束，一向有公主病嘅A股，聽到話無咗阿爺張信用卡任碌，自然發脾氣喺地下碌地沙，乜嘢國家隊入市位，乜嘢政策底全部就唔見晒。
跟住再加多個差強人意嘅PMI，個市就由中國跌到香港，再跌到歐洲然後到美國，呢個咁樣嘅循環維持咗兩日。期間A股呢位公主就連降準減息都唔理，直到噚日美股大升，先見到個市升番。
不過在執筆之時，《彭博》引述消息指，中國官方喺噚日下午再入市……看來短線維穩先係阿爺終極政策目標。這種飄忽嘅政策下，要令國外投資者有信心返嚟玩，睇嚟仍要一段長時間。
阿爺由將錢拎去直接救股，轉為放水救經濟，股民必定會承受一定痛楚，不過，經濟轉佳，企業業績理想，吸引不論國內外投資者重返股市，個股市先可以健康發展，用盡所有行政手段，減少市場參與者，只會令股市雖不能跌亦無力上，失去融資能力。阿爺入市接貨，接埋一堆殼股，又令人質疑私相授受之餘，又引起日後處理方法嘅問題，日後的嘅攤子似乎比唔救股好唔到幾多。
流氓