「我係周嘉發，一、兩歲已住喺又一村，讀書時，社會正值反高鐵，我開始知道政府有好多唔公義嘅事：逼遷居民、好多嘢冇交代清楚就逼立法會通過、發展大於一切。我覺得年輕人要投身社會，用行動改變社會。我中小學讀喇沙、大學讀港大、屋企喺又一村，三樣嘢睇落以為我係自由黨成員，但我睇到社會流動性低、貧富懸殊相當嚴重，同學仔未畢業已一身學債，俾人撳住搶。
我2011年加入社民連、2012年替吳文遠助選、2013年喺港大學生會同周永康一齊奪回染紅學生會嘅勢力，之後參加佔中商討日、預演佔中、決戰龍和道，俾警察拉過3、4次。雨傘運動後，我希望將心力放喺社區，自己社區自己救，讓又一村居民知道，建制派做到嘅，泛民主派都做到。
有人話呢區係中產，社民連好難贏，但任何人堅持做社區工作，都係唔容易，大家都係鬥勤力、講理念、講地區工作，區區難度一樣咁高㗎啦，講到底，地區工作都係講建立人際關係。我見過支持社民連中產，佢哋會同我講不滿李梓敬嘅刻薄言論，好多街坊都會支持社會要有更好嘅福利保障。
稱自由黨偏幫商家
自由黨推崇嘅價值係偏幫大商家，維繫利益集團。街坊會講，又一村租金已貴到住唔到，自由黨為呢啲中產爭取到啲乜？我比李梓敬優勝嘅係，我可以認真、全程投身地區工作，可能佢需要返工，但我啱啱畢業，我可全心全意喺呢區工作。我試過因為要解決一棵大樹遮住一盞街燈，搞足幾個月。我唔係好似其他政黨咁，有成個辦公室比我慢慢學，我一個人，一路做一路學。
呢區泛民支持度都高，好多係支持公民黨、民主黨，但我希望居民明白，社民連只係表達意見手法有少少唔同，但都係企喺市民嗰邊。若今次輸咗，都會繼續做，否則令人印象唔好，覺得我係glory hunter，所以一定要做落去。」