「我係李梓敬，我哋自由黨喺好多中產區都有服務，好多中產同豪宅區嘅區議員都係自由黨，山頂、寶馬山、九龍塘、南區。經驗多自然有優勢。上屆我喺葵青公屋區參選，嗰區曾經係自由黨，我輸咗之後，好多住喺又一村嘅Auntie同我講，中產區都遇到好多問題，問我點解唔返嚟幫手。
暗指社民連空降
又一村入面，我哋嘅黨友都有好多，黨魁方剛住喺度、立法會議員張宇人喺本區經營又一村會嘅餐廳。呢區內街居民活躍於又一村會，呢個會唔係你隨便可以入，我好細個已經係會員，我媽咪同爹哋都好活躍，係又一村會嘅羽毛球隊。喺我做地區工作前、甚至未加入自由黨之前，已經喺呢區識好多人。
住呢區唔係代表你扎根呢區。即使你住喺呢區，你識幾多人呢？要識人就要參與法團，我係又一居一期嘅法團委員，又係又一村花園嘅法團委員，我喺呢區工作咗足足3年。若要你聯絡區入面所有法團主席，你可以喺幾短時間內做到呢？我係唔需要出封信，對我嚟講，只係一個WhatsApp。
我唔覺得今次（自由黨對社民連）係貧富、泛民建制，左翼右翼嘅對立面，To most people，佢哋真係唔care，對佢哋嚟講，係邊個可以幫到手，同埋有冇能力、知識、資源去幫手。我反而認為，今次係長期為社區服務、定係空降嘅對立面。我係咪贏硬？我係審慎樂觀。社民連係咪好易K.O.？我係唔會睇人哋，呢一區我真係想服務。
全職做區議員，本身冇工作，其實係劣勢，有街坊問我，『其實你有冇嘢做？』佢哋好擔心，一個社區服務者視議員係一份工，擔心以工作做議員，會影響你嘅judgement。又例如，居民同你講投資，講車位價錢，問你又一村樓價點解落後於廣播道，若你冇一定工作經驗、社會經驗或者life experience，你係冇辦法了解。」