才子蕭若元個仔蕭定一果然有計。阿一近年專注拍電影，每次佢都諗到橋做宣傳，除咗娛樂版見報，阿一仲會用埋上市公司通告，皆因佢間電影公司屬於上市公司中國3D數碼（8078）主要業務，公司會不時出通告update㗎。
好似噚日大市反彈700幾點，升11%嘅中國3D數碼馬上出通告，話不明股價升因，順便通知大家佢哋製作嘅電影《猛龍特囧》正式上映，票房亦好。
翻查資料，阿一呢招唔係第一次用，過去四年，最少用過5次，上一次係4月底，公司股價上升，升因除咗同男神黃宗堯再續5年藝人合約外，就冇其他。
類似情況，2013年有2次、2012年有1次，同樣係股價冇特別升因，除咗張智霖成為旗下藝人同計劃拍《衝上雲霄II》電影版、《白宮淪陷》上映首4天每日均為票房冠軍、改編自暢銷小說《一路向西》之同名電影開鏡。其實港交所（388）對呢類通告有冇指引㗎呢？