「電車狂人」又出招！向城規會申請取消電車路線嘅前規劃署規劃師薛國強（圖），噚日喺中西區議會一人單挑十幾個區議員、政府同電車公司代表，更俾區議員鬧爆佢嘅建議唔合邏輯、譁眾取寵，但佢一於少理，話西港島綫起好之後巴士都重組，點解電車唔使？仲話要懷舊就將電車放入博物館喎！
有區議員噚日話，如果取消電車，市民實同你死過，薛強調一心一意為香港，認為電車喺路面行係太奢侈，質疑區議會係咪支持過起好港鐵後會淘汰電車？結果被議員鬧爆佢老屈。規劃署就話個取消電車建議唔係政府提出，城規會已收到1.5萬份意見，大部份都反對；運輸署就話塞車源頭係違例泊車同車輛上落客，取消電車未必可以紓緩擠塞。