今日係農曆7月14日盂蘭節，俗稱鬼節，亦係梁振英嘅農曆生日；明日就港股期指結算，亦係A股黑期結算。
昨日新加坡A50期指即月及下月成交合約近104萬張，未平倉合約超過68萬張，即月期指大低水2.5%。好邪，小心！
隔晚美股出現彈散市，道指一度飆升441點，點知投資者忽然又憂慮中國形勢，臨尾一小時市況急轉，收市倒跌204點，好crazy！
外資真係咁擔心中國？港交所（388）滬港通專頁顯示，滬股通昨日錄得78億元人民幣淨流入，計及周一、周二分別錄得81.5億及79.8億元淨流入，3日就有超過239億元取道滬股通北上買A股。外資一邊擔心，一邊撈底！
經濟差、股市弱，央行前晚再出招，減息兼降準，今趟係舊年11月以來第五次減息及第三次降準，亦係兩個月內再度雙降。
央行近日板斧齊出以增加流動性，短期的有逆回購、SLO，中期的有MLF、PSL，長期的有減息、降準，可惜中港股市對重複的招數已麻木，滬綜指昨日再跌1.3%，收報2927；恒指更跌324點或1.5%，收報21080，兼50日線跌穿250日線，出現死亡交叉。
長建績佳派息吸引
想趁別人恐慌時貪婪，宜揀績優股，要係業績穩定增長那類，例如長江基建（1038）。長建係公用股，就算加息，影響輕微；且國務院剛批准養老金入市，利好具防守性的股份。長建從事發展、投資及經營基建業務，除了本港外，還包括分佈於英國、澳洲、新西蘭、荷蘭、加拿大的能源、交通和水處理業務，亦有少量中國業務，受中國經濟影響微。
長建上月已公佈中期業績，少賺78%，但純利急跌，只因電能去年同期分拆港燈（2638）後錄得190億元一次性收益，以及長建及電能6月出售港燈股權錄得賬面虧損。
撇除該兩筆一次性項目，長建中期實則多賺22%。截至6月底，手頭現金約78億元，淨負債比率為9%。
長和重組，整合和黃及地產業務後，市場正密切留意系內會否有其他重組、收購及改革，例如整合長建及電能（006）。
長建持有電能38.87%股權，若成功合併，可套現690億元，作發展之用。大摩引述管理層指，近月環球商品價格大跌，油、汽、礦業公司急於出售非核心基建資產，長建大把選擇。就算唔整合，在現金充裕及明年係20周年大日子下，相信亦會有搞作。
長建上市以來，股息連年增加，股價表現硬淨。大市自高位回落兩成半，長建只回調7%；此外，市場憧憬長建與電能合併，併購一日未實現，股價料仍穩守57元水平（即去年第4季密集爭持區頂，阻力突破變支持），昨收報63元，逆市升2.2%，可候60元左右收集，上望70元。
割柑人
本欄逢周四刊出