上周啲西甲相信悶親唔少球迷，10場波入面有四場0:0、三場1:0，最多波入嗰場竟然係禮拜一場獨腳戲，伊巴作客贏CF格蘭納達3:1。美斯同基斯坦奴朗拿度（C朗）難得一齊冇波入，但喺英超淨係識射12碼嘅蘇爾達杜返到嚟西甲，就即刻搵番對射門鞋，都真係幾詭異。由於報紙版面有限，西甲賽後跟進唔多，小弟就借呢個專欄講吓令人失望嘅皇家馬德里，同埋加里夫巴利踢進攻中場嘅問題。
「戰術大師」賓尼迪斯未開季已經爆響口，話會用巴利踢進攻中場，激活呢位價值成億歐元嘅威爾斯球員。結果係點？咪就同希杭踢成0:0，攻唔入對手。可能有人話巴利離開熱刺前嗰季都係踢中路，踢到做埋英超最佳，點解嚟到西甲就踢唔掂中路呢？因為隊波嘅定位同隊友都唔一樣。
熱刺只係一支英超黑馬，遇到其他中游球隊時，對手未必會擺大巴，可能會同你鬥控球或者鬥攻，所以巴利喺中路會有較多空間。巴利最強嘅係速度，最需要嘅係空間，踢中路本身已經少空間；而皇馬對住希杭佔近七成控球，壓住半場攻，根本冇空間畀巴利發揮。
隊友方面，熱刺班隊友服巴利，願意圍住佢踢，前鋒幫佢開路，中場餵波畀佢；但喺皇馬，呢個人係C朗，而唔係巴利。就算畀你企到喺中路，C朗仍然係負責射門最多嘅球員，所以皇馬進攻中場嘅位置應該揀番個分波同組織叻嘅球員，輸送畀C朗，巴利就專心返右路做突破啦。文：咖喱