劉德華、劉江、劉江華、江華……嘩！好亂呀！劉德華同江華一直被指樣貌同舉動都好似，佢哋2003年曾經喺港台一個元宵活動上相遇，當時表現十分投契，尤其係江華同華仔合照，以及喺台上演出時，台風同甫士都真係似到爆。
傾合作傾湊仔
噚日下晝江華喺微博上載兩張同劉德華嘅合照，兩位年過半百嘅美魔男同以往分別唔大，成熟有型又穩重，江華僅留咗一個字：「禪」。記者噚日致電江華，佢話佢哋「有嘢傾」，但就賣關子話暫時唔可以透露詳情。問係咪劉德華搵佢？江華答得好禪：「佢哋有搵我，我都有搵佢，我搵佢時，我發覺佢都有搵我，想同我傾啲嘢。」係咪劉德華開嘅製作公司想搵佢合作拍劇？江華就哈哈笑話：「呀？係咩？我想拍電影多啲喎，總之暫時唔可以透露。」江華𠵱家轉咗做保險經紀，但佢話好期待同華仔合作：「有好劇本、好團隊，有誠意嘅製作一定出嚟，其實我冇話唔拍。」
12年後重逢，江華覺得今次同劉德華見面好難得，除咗工作大家仲有傾仔女經。問佢哋係咪同以前一樣咁有型靚仔？江華話：「呢個唔係我哋答，大家都做咗老竇，呢樣係最大嘅改變。其實我一直唔覺得似，係大家覺得好似，最似一樣咪形態，真係好似。」
撰文：馮仁昭