你認為自己好清楚「大頭怪嬰」故事，有啲嘢你未必知！
農曆七月鬼魅陰沉，《毛管動》請嚟「鬼王」潘紹聰，一連兩集為大家解密香港人集體靈異回憶 —「大頭怪嬰」。
神隱多年嘅「怪嬰目擊者」Jeffery現職商人，15年後今日，佢終於從低調跑到鏡頭前，講出佢嘅「真相」。15年前 (2000年)，Jeffery打去潘紹聰主持嘅電台節目，報稱於1963年約7、8歲之時，同13位同學喺西營盤踢波，不慎將足球踢到山坡下，於是落山坡執番，點知碰上被困喺鐵籠裏面，頭大如竹籮、身高只得約一米二三、身上無任何生殖器官嘅「大頭怪嬰」。Jeffery大驚，立即跑回山坡上，再同 13個 同學們落山探討，眾人因而成為目擊者，就連當年嘅小學校長，都係知情人士。
Jeffery表示見過「大頭怪嬰」嘅同學，都各有靈幻遭遇，甚至有超能力。2001年，怪嬰故事被改編成電影《恐怖熱線之大頭怪嬰》(鄭保瑞執導，馬偉豪、江玉儀監製)，由何超儀、吳鎮宇、周麗淇、李璨琛同埋電台主持潘紹聰等主演。
由Jeffery掀起嘅靈幻潮15年來不滅，坊間對「大頭怪嬰」嘅發源地眾說紛紜，同時亦衍生出唔同嘅故事版本。去年，台灣緯來綜合台靈幻節目都有談論。港、台兩地流傳嘅版本，包括怪嬰額頭長出多對眼睛、出生時已能操多國語言、出生後醫生發現母親內藏被嬰兒食清光慘死，以及怪嬰被當時香港政府囚禁作研究等等。
各位靈異愛好者，信不信由你，歡迎留言！《毛管動》大頭怪嬰鬼節再現，去片！
預告：下一集將揭開目擊者點樣被「怪嬰」影響一生，以及事件背後嘅奇幻迷思。