減壓神物填色書《Secret Garden》風靡全球，如果填上癮不如試試填上牆。賽馬會創意藝術中心（JCCAC）正舉行「知蘭而行：探索蘭花的奧妙」展覽同藝術工作坊，有個畫滿花草嘅巨形角落，畀參觀者自由填色。
除咗填色，活動焦點梗係蘭花。香港有成133種蘭花品種，英國都只係得50種，俄羅斯亦唔多於100種；「蘭」字喺中文通常係同墨蘭嘅幽香有關聯，但原來都有「屎」味嘅蘭花，用嚟吸引搵緊腐肉或動物糞便嘅昆蟲喺上面產卵，展覽有得試聞㖭；平時過咗農曆新年棵蘭花凋謝，唔好掉住，原來仲有救，展覽有得學。活動費用全免，展期去到星期日。