向來鍾意向泛民開拖的「幫港出聲」，噚日公佈佢哋委託「香港研究協會」進行只針對廿名泛民直選議員的民調，問市民支持定反對有關議員連任。唔少在場傳媒質疑只就泛民做民調，但唔包建制派，做法明顯偏頗！
召集人周融（圖）就話，咁做因為自己對廿個泛民比較有興趣，想知市民對支持佔中議員嘅睇法喎。民調發現，泛民中以民協馮檢基評分最高，最低分係社民連「長毛」梁國雄同黃毓民喎。幫港出聲喺今次民調，亦為一啲非議員人士支持度做評分，話調查顯示市民對壹傳媒創辦人黎智英「好反感」，因為佢嘅支持度淨值只有負17個百分點，但係即時有唔係《蘋果》嘅行家話，根據港大民調，特首梁振英民望淨值係負39個百分點，低過肥佬黎好多，豈不是話CY仲乞人憎？