近期港股市況非常難炒，但鷹君（041）主席羅嘉瑞已經開始撈底。噚日佢出席旺角朗豪酒店改名儀式，話就話雖然自己睇唔透個市況，更指「好多人都唔知清楚股市發生乜事」，但就已經開始慢慢買番啲股票，投資一啲自己熟悉嘅大公司，實行人棄我取。
講開投資，羅嘉瑞近期同長和（001）主席李嘉誠齊齊入股五龍電動車（729），羅生自稱有駕駛過Tesla，仲賣花讚花香咁話投資呢間公司係睇好中國電動車市場，覺得中國遲早會起好多充電站，市場潛力仲大過美國咁話。
講番個活動，翻新後嘅旺角朗豪酒店將會易名做「香港康得思酒店」，英文名Cordis Hotel，由奢華路線改行商務及休閒路線，原本計劃翻新後房價加價15%，但受到近月環球貨幣大幅貶值影響，令唔少旅客轉至到歐美日等國家旅遊，所以「康得思」短期內租金同𠵱家差唔多喎。