真係唔講唔知，立法會議員（地產及建造界）石禮謙原來係國際學校英基主席，佢噚日出席學校以英基前主席唐家成命名嘅「唐家成獎」頒獎禮，得獎者全部都係國際預科文憑試（IB）攞到42分以上高材生，或者對社會、運動、學校有貢獻嘅同學。
石禮謙向得獎學生介紹唐家成時，幽老友一默，「你哋記得問佢攞卡片啊，佢係證監會主席嚟㗎！」唐家成對英基都好有感情，唔使石禮謙多講都會照顧班學生。
唐家成同華華講，英基有唔少非華裔學生，每年有超過四分一學生留港升學。佢覺得香港嘅大學應該要有唔同背景、唔同睇法先最好，年輕人多意見好正常，咁先識得成長。若果香港可以有多啲咁諗嘅開明院校高層，香港就可以少啲對現況不滿嘅學生。