民政事務局前局長曾德成無啦啦被炒，愛國愛港人士梗係媽聲四起，但查實唔少政界中人大鬧之餘，私下都幾同情接任嘅劉江華。點解？因為佢要喺各界對CY炒人嘅負面情緒下接班，無論係咪合適接班人，都肯定未上任先扣分，冇乜人理佢係咪有能力。
事隔個零月，有政界中人私下話，CY炒曾德成絕對唔啱，但搵劉江華頂上，未必唔係好事。據聞佢真係勤力都不得之了，密密見人，比曾德成主動好多，好似早前見埋民主黨乳鴿仔，都算幾破天荒，唔少人都對此受落，覺得局長係要同各界多啲溝通，理得你乜嘢黨派。
有政界中人笑笑口話，最近港大公佈嘅問責官員評分調查可見，劉江華一上榜就入「十大」，即係12局長裏面，係第10個民望高嘅局長，有教育局局長吳克儉同發展局局長陳茂波墊底，唔係包尾算唔錯嘞。花生友相信呢番都係戲言嚟㗎啫，尾三當十大，係咪太阿Q呢？但呢個民調卻可見，劉江華有別於吳克儉同陳茂波，冇乜嘢大過失就咁低分，明顯先天好不足。
後天點樣補救？花生友當然唔知，有大師之稱嘅工業界議員林大輝日前則撰文話，一出閘即脫腳，要喺任內有所作為，談何容易？如果一如消息人士所講，德成局長被炒係因為青年工作做得唔好，咁劉江華必須係呢方面交出成績，指劉江華若然只顧明哲保身，唔勇於承擔，處事避重就輕，必然受社會指摘，亦會證明特首炒錯人，成與敗，睇佢自己造化咯。
花生友
周二、四刊出