人民幣月初「暴力貶值」，期間訊息混亂，加上內地經濟數據之差已「冇得再呃」，觸發市場對人仔持續貶值的預期。結果，offshore投資者恐慌拋售人幣資產，點心債都因為缺乏承接而令債價大幅擘闊。至於onshore，資金外流情況亦急速惡化，有內地經商的朋友指近日匯款回港已較以往困難。終於，人行祭出「雙降」大招，下調息率兼存款準備金率，以紓緩走資壓力。
分析師朋友說，原本大家傾向相信大幅貶值是中央的last resort，唔到情況極壞，唔會輕易使用；惟人行日前竟選擇「雙降」放水，說明中央很可能決定讓人仔繼續「貶落去」：「今年底貶到6.7（每美元兌人幣）、定真係會去到7，幅度就冇得估，但方向係『貶硬』㗎喇。」內地經濟之大鑊，可能遠超你我所想像。
阿爺過去一個多月來傾盡心力拯救的A股，已返魂乏術，跌穿3300、3400點這些新一輪孖展拆倉位，「人踩人」式的deleveraging自此會沒完沒了，唔好再幻想放水會對股市有很大的提振作用。芬佬認為起碼要跌返去2100點水平，方可再作打算。至於向來作為「提款機」的港股，在經濟、企業盈利前景都轉差下，亦只會向下尋底。最波動的市況雖然暫且已過，但陰乾式咁跌法，才是「死咗都唔知咩事」。朋友說，恒指今年底前可能見19000點，「但不代表這就是『底』。」
海迪