英聯盃周二就上演23場次圈比賽，唔少英超球隊登場，新特蘭前鋒迪科爾（右）就最威水，個人大演帽子戲法下，幫「黑貓」主場6:3大勝乙組嘅埃克塞特晉級。迪科爾最近用60,000鎊年薪請私人助理，仲俾人話要求好嚴格，睇嚟應徵者都要睇熟呢場比賽，唔係盞俾迪科爾問到口啞啞。其餘英超球隊方面，最失威就係升班馬屈福特，換晒11個正選嘅情況下，作客0:1不敵普雷斯頓出局，屈福特聯賽未開齋，專心護級都正常，不過周六英超作客榜首嘅曼城，我求大俠就認為以曼城呢排強勢，屈福特都係凶多吉少，又邊使喺英聯盃留力喎。
熱刺硬撼阿仙奴
另外第三圈已經進行抽籤，最矚目就當然係熱刺主場對阿仙奴嘅北倫敦打吡，兩軍開季都係狀態麻麻，未知九月尾交手時可唔可以回復狀態，水晶宮主場鬥英冠嘅查爾頓，亦都係東倫敦打吡，另外維拉鬥伯明翰亦都係中部打吡，戲碼唔錯㗎！