為咗撐隊波，可以去到幾盡？話說一位原名羅健鋒嘅曼聯球迷，為咗支持愛隊，將自己喺身份證個英文名改為Law, Man United Dick，之但係佢將件事放去唔公開群組share後意外流出，換來一班反曼球迷嘲弄，成為網絡紅人；而佢為紅魔改名事迹更傳到去外國網站都有報道，認真「紅」出國際！
繼「激烈的海𪂇」同埋「屠龍麥粒花」兩個外國人改嘅中文名引起熱議後，噚日再有人因為改名而成為網絡紅人。話說據悉喺廣州出生、住喺香港嘅紅魔粉絲阿Dick，攞到本港永久居民身份證時，決定喺英文名上加埋Man United，成個名由Lo Kin Fung變咗做Law, Man United Dick，仲放埋喺《曼聯球衣分享及自由買賣》個fb群組表明「將我這輩子都奉獻給了曼聯，願新名為我帶來輝煌與魔性！」
曾徵友去奧脫福朝聖
從事保險業嘅阿Dick之前喺fb曾公開徵求同道中人，齊齊去奧脫福朝聖，就連生日蛋糕一樣離唔開紅魔。生為曼聯人，死為紅魔鬼嘅佢，今次魔性入身份證嘅舉動，就連英國《每日鏡報》 （小圖）同《101greatgoals》等外國足球網站都有報道，真係紅出國際。不過，阿Dick改名原本只係諗住喺紅魔球迷自己友個群組開心share，但個post就被意外流出，仲換來《反獌大聯盟》、《利物浦球迷俱樂部》等非曼迷群起抽水。事實上，Dick呢個名喺外國解釋上，其中一個意思係解性器官，如今加上曼聯喺前面，難免會得出負面結果。
開公司都叫「紅摩」
我求大俠搵到阿Dick回應，佢雖然有啲煩惱，但就話好多魔迷撐佢：「改名係認真嘅，因為支持紅魔而改，本來只係喺番唔公開嘅群組share，點知會有內鬼share咗出去，引嚟其他球會嘅球迷人身攻擊，覺得唔受尊重！本身件事搞大咗都唔緊要，so far亦好多謝一班曼聯躉撐我。」至於阿Dick嘅公司命名係「紅摩王朝投資公司」，而唔係用番「紅魔」，佢話：「因為間公司係工作用途，攞番同音，自己鍾意就OK喇。」
