一台獨大，一向都搞到既得利益者冇咩動力去進步。香港𠵱家基本上得番一個免費台，劇集情節老土又例牌唔在講，處境劇兩個大男人圍住個港女氹氹轉樂此不疲，我都可以忍你；所謂talk show主持人講埋啲唔識笑嘅笑話，要單晒眼畀訊號現場觀眾先有掌聲、笑聲，我都可以忍。但連新聞節目都可以咁粗疏，抗日戰爭可以用五星紅旗，真係同強國電影《開羅會議》有毛主席份，有異曲同工之效。
意甲一隊獨大，祖雲達斯四連霸，近兩季更以雙位數積分拋離第二名羅馬，好似其他19支球隊新一季目標充其量爭第二咁。新一季祖記又買埋文迪蘇傑、保羅戴巴拿等好手，就算有泰維斯、派路同維達爾等主力離隊，冠軍都好似手到拿來；不過，佢哋開鑼戰竟然主場輸畀烏甸尼斯，由2013年1月至今47場主場聯賽不敗身終於被打破，都叫做歐洲主要聯賽開鑼戰最大冷門。
小弟賽前貼祖記[-1]「主勝」，唔係寫今次專欄嚟遮醜；不過，現代職業運動隊伍已經邁向專門化、科技化，球員除咗體能狀態，心理狀態都好緊要。其實各地聯賽冠軍都遇到球員爭勝心下滑問題，車仔聯賽苦戰至第三場先險勝西布朗開齋；巴塞西超盃輸得肉酸，聯賽再對畢爾包都係僅熟。祖記中後場老化問題都幾嚴重，門將保方再次失落歐聯，對信心影響唔細；保羅普巴去定留，態度亦唔明顯；教練艾基利又係文質彬彬型，未必鬧得醒球員，忽然間真係好掛住派路。文：牽牛