又有富三代喺商界蒲頭。瑞房（272）主席羅康瑞趁公司中期業績，帶埋愛女兼中國新天地執董羅寶瑜（Stephanie）「見世面」。佢一身白色套裝，直髮兼化淡妝，畀人一種清新的感覺，特別搶鏡。
望住「貓紙」自我介紹
現年33歲的Stephanie，雖然有11年建築設計及大公司的工作經驗，但首次見住一大班記者，難免有些少緊張，講嘢有時「食螺絲」，亦都要望住「貓紙」做自我介紹。
佢話自己對商業有興趣，於是3至4年前由美國搬到上海，開始參與中國新天地工作。
羅康瑞亦都好識做，除咗點名話出租面積達7,000平方米的上海「THE HOUSE新里」係由Stephanie負責，同時已經全部預租，即將在年底開業外，亦都畀個女負責回答中國新天地上市的問題。
Stephanie似乎一早準備好，話上市資產折讓較大，未必畀股東帶來最大價值，所以暫時唔會上市。
不過領展（823）早前收購企業天地1號及2號辦公大樓，之後人仔「暴力貶值」，令公司有滙兌損失。
被問到今次交易是否成功，Stephanie就唔係好識答，只係話公司無法預計，而筆錢都會用於內地發展，人仔貶值影響唔大。最後都要勞煩羅康瑞解畫，指人仔過去已升值三成，公司過去賺咗唔少滙水。今次「Stephanie見面會」算係勉強及格啦。
外貌清秀的Stephanie，自然有男士留意。不過華華見到，佢左手無名指已經戴住隻鑽戒，一眾男士似乎要失望了。
李華華
mailto:[email protected]