香港零售市道有幾差，相信大家見到銅鑼灣街上有幾多間吉舖，都已經好清楚。不過，唔少大陸品牌趁租金平咗，好似金舖老鳳祥咁，外闖到香港吸取海外發展經驗。最新一間就係大陸好紅、出名服務好嘅海底撈火鍋。
高力國際負責幫海底撈搵緊舖，初步屬意自由行較多嘅銅鑼灣同尖沙嘴。海底撈喺中國有過百間分店，人均消費約100蚊至150蚊人仔，好明顯唔係sell平，公司估計「港版」海底撈人均消費再貴啲，達200蚊至250蚊。
呢間來自四川嘅火鍋店，早前已進軍台灣、新加坡同首爾，做得咁成功，主要因為服務周到；好似客人等位期間，會提供免費修甲、擦鞋、飲品零食等。但華華覺得，如果海底撈英文名（Hai Di Lao）可以執走埋啲土味，咁就更perfect啦。