農曆七月，鬼門關又大開，今日仲要係七月十四日，有冇覺得陰風陣陣？綜合網上嚴選亞洲十大猛鬼酒店，台北嘅五星級酒店君悅酒店（Grand Hyatt）排第一㗎，高雄「HL」（化名）酒店及台北麒麟酒店就喺第6同第7位。八方同事日前特別去咗台北君悅過節，見到酒店裝潢，或者就係鬧鬼玄機。
坊間流傳君悅位於台北信義區，係日佔時期嘅刑場、亂葬崗，加上外形睇落似墓碑，一直有鬧鬼傳聞。有時可能因為裝修令人疑心生暗鬼，事關一入君悅大門，正門上方就有個特大嘅金屬風鈴，大堂一對特大符咒置於前往高層嘅通道前，黃紙配合黑色「佛令」及「敕令」等字，好有震懾力。
麥玲玲教入房先敲門
大堂亦有幾個風水裝飾，包括左右兩個金屬大球體、以及兩邊對稱嘅流水。據聞大堂嘅噴水池雕飾亦用上相傳能鎮邪及避火的神獸龍子螭吻。有執房大姐透露，大堂兩個大符係密宗大師用來祈福，風鈴則係風水作用，而佢喺酒店做咗30年都冇撞過鬼，仲話：「你不犯他，他也不犯你。」
八方同事都去到同被指猛鬼嘅台北麒麟酒店一探，但到訪時已清拆。至於簡寫「HL」嘅酒店據聞係高雄某六星級酒店，網上流傳住客夜晚見過有細路女喺床上跳。八方同事都去過，發現有唔少鎮邪之物，包括相隔一條馬路就係佛堂，酒店三面都被麒麟及用以鎮邪嘅貔貅等瑞獸包圍，不過可能係樓齡過20年，電梯又舊，令人不安啫。
堪輿學家麥玲玲話，聽過台北君悅鬧鬼，指唔少朋友住過都話遇怪事，又話以佢所知，大堂兩道確係符咒，更曾聽聞酒店「壓住鬼門關」。為求安心，佢話大家入房門前可先敲門，或者多穿視為能夠辟邪嘅黃色衣物。八方覺得聽吓呢啲鬼古無妨，但若然行得正企得正，驚咁多嚟把鬼。咦，農曆鬼節出世嘅梁振英，唔知會唔會去台北君悅慶祝湊熱鬧？
李八方
mailto:[email protected]