有「股壇金手指」之稱嘅惠理（806）主席謝清海對中港股市充滿信心，早前估計A股可攀上2007年高位、恒指年底有望見32000點，可惜中港股市近日都唔係好聽話，連日喪跌，都冇乜支持位可言，人行噚日傍晚突然宣佈減息兼降準，唔少人都準備趁股市反彈出貨走避，可見股民幾咁虛怯。
謝清海見慣風浪，加上佢神機妙算，今年5月趁市旺減持惠理套現15.7億元，近日環球股災，應該都冇影響佢心情。佢噚日中午坐車去到灣仔福臨門食晏，笑容滿面，仲有美女相伴。佢腳步亦相當快，華華原先想捉住佢，就股市前景指點一下迷津，點知佢快步就行入福臨門，叫都叫唔住！