全城熱撐電車,估唔到身家豐厚嘅自由黨榮譽主席田北俊都係電車用家?佢喺facebook上載同中西區區議員陳浩濂搭電車到上環用膳嘅相,留言話對近日有人提出取消部份電車路段覺得「超不爽」,反而提出,「不如順手拆埋政府總部同立法會,咁埋(咪)無人會示威囉!」
向來鍾意抽水嘅田少,點會錯過任何抽水機會?佢不點名話喎:「其實好多嘢都阻掟(碇)啦,咪仲喺度。」到底邊個咁阻碇?八方睇到唔少網民嘅熱選,係特首梁振英。田少亦憶述同電車嘅一段緣,話以前由金鐘到位於中環嘅舊立法會大樓開會,「十次有九次都係搭叮叮」,覺得最方便。