全球股災，內地科網巨頭阿里巴巴亦抵擋不住，曾一度跌穿招股價。投資者巧驚驚，持有阿里認股權或股份嘅員工就更擔心紙上財富不斷蒸發。阿里首席執行官張勇噚日就發咗封員工信，不過唔係增發獎金提高士氣，而係叫員工「忘掉股價，腳踏實地」。
今年5月先上任嘅張勇似乎腳頭唔多好，阿里呢三個月股價係咁跌，佢就唔理股價，要求員工將眼光由股市回到客戶身上，仲講咗句「莫為浮雲遮望眼，風物長宜放眼望」即係點？咪就係叫員工繼續工作，放長雙眼等股價升番囉。
內地互聯網公司通常利用認股權爭人才，撞正阿里股價大跌，員工就算持有認股權，公司嘅吸引力都大減。
阿里老闆馬雲喺阿里上市時講過，「今天我們融到的不是錢，我們融到的是信任。」睇嚟佢要諗計增加員工對公司嘅信任先得喇。