將於周日假將軍澳舉行的《2015香港小姐競選》，一班候選港姐連日接受訓練和出席宣傳，昨由前奧運代表陳宇寧帶領下，在太古康蘭居出席水上擂台活動，怎知5號林凱恩忽然抽筋遇溺，獲救生員救起後不停飲泣。
大熱門錫身唔落水
昨日比賽每三人一組游20米，游蛙式的林凱恩越游越慢，游到三分一更舉手示意求救，現場兩名救生員立刻落水救人，托着她的下巴游返上池邊，驚魂甫定的林凱恩行到一拐一拐，邊哭邊說：「係呀，左腳抽筋。」問是否熱身不足？她說：「可能之前排舞攰得滯，隻腳本身已經好攰，今日努力做啲拉筋動作，落到水有少少抽抽哋，再拉番筋以為OK，點知游到中間換唔切氣狂飲水，以為可以掂到地，諗住又彈番起身，一落去就沉咗落去。」
有否覺得無綫安排太緊密令體力不支？她說：「呢個就唔會，可能自己未試過喺比賽情況下游水，一到呢啲環節比較緊張。」據知，林凱恩休息過後，昨午繼續返無綫接受訓練。
至於大熱門1號麥明詩、2號馬詩晴和8號程莉欣沒落水，麥明詩解釋：「平時有游水，但呢排忙瞓得少，皮膚有濕疹。」有記者指她怕濕疹不落水太錫身，麥明詩說：「我係怕出番啲疹，到時化妝都遮唔到。」是否無綫安排行程太緊密？她坦言：「係攰嘅，盡量休息多啲，不過我覺得無可厚非，始終個騷係幾日之後嘅事。」記者指她攰到跌watt樣子變殘，她說：「呢排係瞓得少啲，惟有化濃啲妝，諗住呢星期儲能量，禮拜日爆發。」
撰文：皓騫
