白鴿黨6名立法會議員噚日空群出動喺灣仔行人天橋派發首份聯合工作報告。率先踢爆鉛水問題嘅九龍西議員黃碧雲人氣急升，接受記者訪問期間，有市民突然上前要求簽名留念，話多謝佢幫市民監察鉛水，希望再多提建議，同佢影相嘅人亦唔少，風頭幾乎蓋過主席劉慧卿，佢話未來會狙擊教育局局長吳克儉（吳得掂），唔知會唔會掀起另一場大戰？
叫學生用水樽「勁騎呢」
人稱一嚿雲嘅黃碧雲承認踢爆鉛水問題後，喺傳媒前多咗曝光，的確多咗市民認識，八方現場所見，唔少市民同佢say hi影相兼攞簽名，風頭幾勁；有市民亦用手機要求與卿姐、何俊仁合照，涂謹申則大熱天時派到濕身「露點」，仲喺天橋「捕獲」行緊返入境處的入境處處長陳國基，處長非常賞面攞咗份報告睇。
白鴿黨呢份聯合工作報告，一嚿雲有份發起製作，佢話希望市民明白白鴿黨喺政改之外，仲關心好多民生問題，暫時印咗5,000份報告，嚟緊會再加印，下月初到九龍派發。
既然贏咗一仗，梗係要乘勝追擊，一嚿雲透露嚟緊下一步，係要求教育局局長吳得掂幫學校驗水，因為鉛水學校越揭越多，但吳得掂只識叫學生自備水樽，直斥吳「好騎呢」，覺得咁搞落去真係唔得掂，所以要做啲嘢。據聞一嚿雲今日會飛去韓國旅行充電4日，之後趕返香港準備月尾大學開學，即係吳得掂仲有幾日可以唞吓氣喎。
李八方
mailto:[email protected]