隔牆有耳：
$20嘆名廚手藝　
美食車進駐樂富 - 李八方

財爺早排建議引入歐美流行嘅美食車，啱啱改名嘅領展亦喺旗下sell高檔嘅樂富街市樓上搞「貨櫃/餐車美食派對」，搶閘出動Food Truck。

參與嘅都係名廚，包括日式粵菜師傅尹達剛、曾演出周星馳電影《食神》嘅戴龍師傅，仲有肥媽Maria，下月3日、5日及6日都會進駐樂富廣場露天平台嘅改裝貨櫃，整啲特色小食，每款20蚊，所有收益捐畀慈善團體。小食全以不同人倫關係為主題，例如「爺孫蝦餃」、「龍兄虎弟炸蝦卷物」咁，仲有《食神》名物瀨尿牛丸！另外又有兩部food van派糖及貝果（bagel），貝果係由做banker嘅混血靚女Rebecca整㗎。
話時話，美食車十畫未有一撇，點解領展可以搶閘搞？領展整合市務策劃主管徐綺漣話，已領足臨時娛樂牌及臨時食品牌，「（美食車）只係part of the decorations」。