【科技籽】高智能射穿牆　《R6: Siege》打破傳統

【科技籽：發燒專科】
在香港，《Rainbow Six》可說是第一身射擊（First Person Shooter，FPS）遊戲的玄門正宗！還記得十多年前網吧的全盛時期，它差不多養起了半個行業。系列睽違七年，新作《Tom Clancy's Rainbow Six: Siege》（《R6: Siege》）將於12月1日推出，今日請來「第一屆香港電競節」創辦人之一Ryan及其老隊友Kurt試玩，「隊形係今集重點，游繩同穿牆令遊戲嘅策略性更高，打破咗傳統FPS嘅作戰概念。」

Ryan及Kurt二人均是《R6》粉絲，由《R6: Rogue Spear 》開始一同上場殺敵。

由於甚少人知道能在現場試玩《R6: Siege》，5 VS 5的遊戲，卻只得四、五個玩家。

今集遊戲重點是射穿牆，camper冇運行了。

很多人來到電競節只懂當觀眾看別人在台上對打，卻不知可在現場試玩《R6: Siege》。

於1999年推出的《Rogue Spear》，乃《R6》系列當中最紅的作品！2000年的《Urban Operations》及2001年的《Black Thorn》，至今仍為人津津樂道，可惜自2008年的《Vegas 2》後開始斷纜，令不少gamer十分失落。
直至去年E3遊戲展，開發商Ubisoft正式發佈新作《Siege》，讓大家重拾組隊激戰的衝動，Ryan說 :「喺第一屆香港電競節出現嘅試玩版《Siege》只得一個關卡，類似最經典嘅使館版圖。但重點係全亞洲區首站，比韓國同日本呢啲電競發展成熟嘅國家仲要早，睇到Ubisoft對推廣香港電競不遺餘力。預計下一站會係台灣，另外喺12月1日正式推出之後，仲會籌備遊戲比賽，要知道呢類FPS遊戲一有比賽活動，玩家嘅熱情同投入度都會大增。」肥通也是《R6》比賽的過來人，一周操機五晚是常識吧！如果你是經已結業的旺角Cyber Sniper舊客，或者還對我有點印象。這類賽事在香港不常出現，的確會令玩家的熱情進一步升溫。
《R6》的寫實性最教人着迷，「遊戲節奏好真實，唔似《Counter-Strike: Global Offensive》咁跳跳吓，其實跳起嗰陣點樣瞄準開槍呢？要知道槍係有後座力，不是玩雜技，《Siege》模仿得好真實，行路嘅節奏都好慢，好似有重心咁樣。」

游繩放冷槍　Camper冇運行

還記得那些年只要有camper手拿一支sniper或P90守着重要通道，戰事便會變得膠着嗎？這正是當年令遊戲變得乏味及致死的原因，《Siege》明顯下了苦功痛改前非，Kurt說：「一般FPS遊戲都係以槍行先，如果技術夠好，甚至可以單槍匹馬橫掃對方全隊，《Siege》喺呢方面作出平衡。首先係遊戲以攻防回合制進行，所以地利優勢唔會一面倒。同時槍彈可以打穿牆，除咗窗門，有時連身後嘅牆都會成為敵人突破口，令鍾意cam位嘅人，唔可以cam死一個位。另外，所有高牆都可以用游繩嘅方法，喺窗外定位嚟放冷槍，只要好好利用，冇話邊個有特別嘅地利優勢。試玩之後覺得，槍技佔三成，策略同攻擊隊形佔七成，跟市面同類作品嘅遊戲重心啱啱好相反，係FPS嘅新突破。」

射穿牆、掟手榴彈，是很基本的戰術。

試玩版《Siege》只有一個地圖，正是最經典的大使館，但其複雜性非常高。

盾兵由於防護性高，所以行動較慢，而且只有手槍。

重傷急救　誘敵陷阱

肥通身為資深《R6》玩家，當然亦有落場試玩，按鍵擺位跟當年無異，不過唯一要注意的是今集會有工種分別，例如基本的sniper及機槍兵等，此外還有盾兵及工事兵等。盾兵人如其名，攻堅時可以帶頭擋彈；工兵亦十分重要，因為隨身一個大鐵鎚，爆門爆牆只是小事一樁，可為大家省回不少彈藥。
《R6》素有受傷機制，以前頂多只會拖慢行進速度，今次中槍受傷，卻會令你「頭暈眼花」、難於瞄準開槍，如果身受重傷又不至死，還會倒在地上，得靠隊友走到身邊按「F掣」來急救。由於重傷狀態只維持十來秒，失救便會死亡，這點將令遊戲更具策略性！例如先把敵人打傷，再伏擊前來為其急救的隊友，藉此殲滅對手，十分真實。
以往這類FPS遊戲只有跟真人對戰才有快感，但試玩發現電腦嘅AI非常高，沒有死守一個位置，甚至會利用游繩、穿牆等技巧攻其不備。最離譜的一次，居然直接繞到我方起點，對我們全隊作集體攻擊，起初還以為是隊友玩team kill，氣得我破口大罵呢！