無綫電視《星期日檔案》播出有關抗戰勝利70周年嘅專題報道，因為錯用1949年先成立嘅中華人民共和國嘅五星紅旗代表抗戰國軍，網民質疑竄改歷史，通訊局仲收到600幾宗相關投訴，無綫新聞部最終出更正告示，改以中華民國國旗代表中國並致歉，點知被發現錯完又錯。
有網民話無綫將五星旗改為青天白日滿地紅旗時，亦將當年被廣泛視為日本國旗嘅日之丸旗改成日本軍旗旭日旗（圖），博客庫斯克斥做法唔啱，既以中華民國國旗代表中國，就應以日之丸旗代表日本，因國旗對國旗、軍旗對軍旗，批評「成個TVB新聞部有冇人讀過歷史㗎究竟？」有網民之後發現無綫已再修正，而黑鑊就由節目導演孭咗，噚日一「炒」謝天下。