多得哥林張伯斯同比利連不斷將挑戰送到施治面前，呢位捷克門將獲得大量表演機會，踢出加盟阿仙奴後最高水平嘅一場比賽，幫槍手主場以0:0踢和利物浦。
阿仙奴有梅迪薩卡同哥斯尼兩位正選中堅缺陣，用小將哥林張伯斯打正選，結果上半場條防線穿晒窿，張伯斯有好多失誤、右閘比利連亦守唔住菲臘比古天奴。雖然槍手後防有班「豬隊友」，但好在有個神級門將施治。喺上半場尾段施治有兩次神救，先撲出賓迪基接應傳中後嘅近射，睇到施治落地好快！之後一球仲精采，古天奴右腳彎球靚波，眼見個波直飛遠柱死角，點知施治飛身一撲，輕微改變個波嘅方向再中柱！施治今場有八次撲救，係阿仙奴唔使輸嘅重要功臣；換邊後兵工廠搶番唔少攻勢，就輪到利物浦門將米洛列特神勇，最終兩隊互交白卷。賽後迪基亞、連拿、基雲等同行紛紛喺網上大讚施治。
巴神外借重返AC
喺上半場初段，辛迪卡索拉直線劏穿利記防線，艾朗藍斯突入禁區為阿仙奴射入，但旁證話藍斯越咗位。不過睇完慢鏡，就覺得似冇越。賽後雙方領隊都有講呢個越位波，阿仙奴領隊雲格話旁證誤判，入球應該有效；紅軍嘅羅渣士就話：「我有睇到慢鏡，藍斯件衫好似越咗位，旁證呢個決定非常好！」
另外，利物浦將「巴神」巴洛迪利借返AC米蘭，佢周二已經抵達米蘭，進行體測。