特首梁振英突然炒德成局長魷魚，震怒成個左派陣營。查實德成局長同佢唔啱key，根本都係政圈公開嘅秘密，最令政界津津樂道當然係啟德體育城係咪應該起樓而擦出嘅「火花」。《南華早報》噚日再講多咗單德成局長同CY不和嘅例子，佢哋引述消息話喎，德成局長對於CY堅持成立嘅香港青少年軍總會、即係梁太唐青儀做總司令嗰個會呢，好有保留喎，德成局長更加缺席總會嘅成立典禮㖭。
有傳德成覺得呢個組織太形式化，會令外界覺得向青少年洗腦，所以唔十卜，相信因此再次得罪咗方丈。而力撐青少年軍成立嘅CY，噚晚出席菁英會新一屆執委會就職禮致辭（圖）時亦不忘呼籲年輕人更客觀全面了解國家發展。