香港大學社會科學研究中心做嘅全港性語言調查發現，廣東話仍然係香港主要嘅語言。佢哋喺舊年8月到今年1月，用電話訪問咗2,049名15歲以上嘅市民，近有九成受訪者視廣東話為母語；用普通話做母語就有4.7%；而英文只有0.6%。但當被問到香港社會未來主要嘅語言，只有57.6%受訪者認為係廣東話；認為係普通話則有26.5%。
雖然如此，但新加坡南洋理工大學陸鏡光教授認為，普通話取代廣東話嘅可能性好低，「除非係有意識地改變𠵱家嘅語言習慣，我睇唔到廣東話會被普通話取代」。提到近日普教中嘅爭議，佢認為以廣東話教中文並冇問題，對讀寫方面嘅教學更加係行之有效嘅方式，「學中文唔係淨係為咗學普通話，亦包括文學、歷史嘅知識，明顯地用廣東話學係比較好」。