香港旅客減少，零售業開始叫救命，有商界中人同花生友講，最差情況未到㗎，估計過埋呢幾個月，就會越來越多公司頂唔住執笠裁員。正所謂遠水救唔到近火，自由黨、新民黨開始叫特首梁振英同中央講，加開自由行城市救命，但有政界人士話，今時不同往日，估計北京唔會咁易放行，其一係不少京官仍對香港心中有氣，其二係要趁機收拾本土派。
呢位政界中人話，今時今日主政港澳政策京官入面，好多人仍然對香港人逢中央必反，有事求中央打救、冇事就批評北京心中有氣，特別係某啲針對內地人言論，「唔少京官覺得有啲香港人小事化大，歧視內地人」。之前香港政府先叫中央收自由行，據聞唔少內地官員、特別係廣東省、深圳官員已經好唔妥，若然𠵱家又要佢哋開多啲自由行畀香港，恐怕好難，「有啲京官仲覺得，你哋香港人咁叻，經濟唔掂咪自己搞掂佢！」
民怨升溫先燒到CY
另一政界人士話，有京官同佢講過，最好等香港主流市民利益受損，自然會追究嗰班反內地客嘅本土派，所以呢位政界人士話，唔排除北京今次唔再放水，任由香港經濟差落去，「等到時香港人將佢哋嘅不滿，算到去班本土派頭上，咁樣就符合中央對付港獨、本土派政策，何樂而不為？」不過呢，若北京真係咁諗，花生友恐怕，社會民怨會急速升溫，分分鐘未燒死本土派，先燒到特首梁振英，唔通中央都唔想CY連任？
花生友
周二、四刊出