足總噚日喺跑馬地馬場舉行記者會，宣佈推出為期五年嘅「賽馬會香港足球總會五年足球發展計劃」，除咗獲得香港賽馬會慈善信託基金捐助，總金額高達1.2億港幣之外，更開心係足總行政總裁薛基輔露口風，話講咗多年嘅將軍澳足球訓練中心，最快有機會出年動工！
擁三真草場料明年動工
足總主席梁孔德喺五月連任後，早已話明喺任期內落成將軍澳足球訓練中心為首要工作；薛基輔噚日就傳嚟喜訊，話早前向活化已修復堆填區資助計劃督導委員會申請勾地，已獲政府書面確認：「我哋計劃興建一個有六個球場嘅訓練中心，當中三個係真草場、三個係人造草球場。雖然中心造價由2005年嘅1.03億，通漲到𠵱家嘅1.33億，但我哋獲得馬會資助，預期可以喺出年動工，並喺2017年落成啟用。」
講返噚日馬會嘅五年贊助計劃，係由上個月至2020年六月推行，涵蓋草根足球、青訓、女足、五人足球、運動科學、裁判同埋教練培訓工作七大範疇。雖然港超球會未能直接受惠，但薛基輔強調除咗金錢外，青訓、教練同埋裁判培訓等，都會令港超球會得益。