恒生指數昨大跌1158點，最終收市報21251點。自由黨榮譽主席田北俊接受《壹錘定音》訪問時指出，現時股市非常動盪，如小股民想趁低吸納作長線投資，並非合適時機，相反，小股民作短期投機，「跟得貼個市，係好大風險，但係可以賺到錢。」
田指出現時港股藍籌多為內地大型國企，香港股市跟隨內地跌市是無可避免的事，港股短期波幅會十分大，「(升跌)係一剎那發生嘅事，講明係投機，可以直情當賭博咁，今日跌1000點我入，聽日升500點要即刻走，投機要日日計數。」
在如此波動的股票市場中，田北俊為何認為投資者仍可作短炒投機，他有一番見解，「『叻』嘅投資者可以睇得出玄機」，他說明此投資方式只適合「日日坐喺股票機前」的投資者，「要日頭入夜晚出，或者今日入聽日出，跟得貼個市，係好大風險，但係可以賺到錢。」
但田北俊認為現時不宜「趁低吸納」作長線投資，因股市短期仍會上上落落，與其購入「長揸」，不如再留意未來股市去向，「跌定啲先買」。
對香港長遠經濟分析，田北俊指股市一直走得快過實體經濟，股市現時大跌，經濟前景都不會好，他更預料過了聖誕，即明年初的經濟最差。但相比環球和中國的情況，香港算較為好，「因為我哋底子厚，好多藍籌公司始終有根基」，加上他預料美國在現時情況下不會加息，香港經濟不會太過差。