環球爆發股災，昨日股市急插逾千點，投資者愁眉苦臉，人心惶惶之際，劉嘉玲昨日卻心情大靚現身銅鑼灣出席「+0 in motion個人手錶系列」發佈會，身穿露背皮裙性感現波邊的嘉玲，明顯不受股災影響。
嘉玲不諱言早已斬手指戒炒股，皆因有過慘痛經歷，她說：「身邊朋友喊苦喊忽，股票唔實在，買錶實在啲。我008（電訊盈科）之後已經斬手指，嗰時我完全係外行人玩，以為自己係股神，係一個好慘痛教訓。」
爆王菲唔願生
除了全球經濟動盪外，嘉玲直言現時世界看似很不安全，就如昨天出席活動前也遇到法拉利在街上發生爆炸，近期又有不少天災，所以她籲大家要注意安全，事事小心。
至於嘉玲的好友、與謝霆鋒蜜運中的王菲近日現身皆穿寬鬆衣服，因而被傳懷孕，對此傳言嘉玲表示：「好耐之前有人問過，我冇求證，我諗唔會再嚟，唔好啦啩！」王菲是否曾說過不再生育？嘉玲笑說：「好耐之前問過唔會，但係當時唔係呢個（謝霆鋒），不過呢個世界好難講，以我了解就唔會，𠵱家係嘆世界嘅時間。」
提到首次推出手錶系列，嘉玲希望未來推出服裝品牌：「呢個名係有意思，咁多年我都未停過，勞碌生活，做唔同嘅嘢。」嘉玲還笑說老公梁朝偉亦獲贈新手錶，他睡覺時仍要戴着。
此外，嘉玲前晚去了演藝學院，欣賞由吳君如、黃秋生主演的舞台劇《狂揪夫妻》，而當晚還有楊千嬅、丁子高夫婦、邱淑貞等捧場，大夥兒齊到後台探班。
採訪：羅慧敏
攝影：葉君海
