皇家馬德里同巴塞隆拿齊齊喺周日進行今季第一場西甲聯賽，結果都係交投淡靜。皇馬今季由賓尼迪斯領軍，一直都有唔少抨擊聲音，結果第一場正式比賽就失分，作客升班馬希杭竟然入唔到波，0:0和局收場。兩大進攻主力基斯坦奴朗拿度（C朗）同加里夫巴利都有入球機會，其中巴利一次單刀推過門將後選擇喺窄位射門，而唔傳中畀C朗，唔知會唔會又搞到C朗好嬲嬲。
肥賓賽後就話唔太擔心皇馬嘅進攻，話隊波整體表現唔錯，只係射門唔夠準啫。皇馬下場聯賽又係對升班馬，主場對住貝迪斯都入唔波的話，睇怕肥賓都好難再咁輕鬆，開始感受到壓力。至於衞冕嘅巴塞就執番身彩，作客畢爾包靠蘇亞雷斯入波，以1:0小勝。