一直盛傳有意買入大埔白石角逸瓏灣嘅藝人王祖藍，終於落實買入單位，仲要一擲過億買下頂層特色單位，同老婆李亞男作為新愛巢，夠晒豪氣！
王祖藍啱啱買入嘅大埔逸瓏灣II第8座17樓A室，單位實用面積2,809方呎，仲有兩個面積夾埋有3,174方呎嘅超大平台，成交價高達1.1428億元，呎價40,684元，破晒屋苑紀錄。
其實王祖藍對大埔豪宅情有獨鍾，早喺2013年就用超過1,300萬元買入同區雅景花園一幢洋房作為新婚愛巢，不過之後因為裝修問題決定換樓。
之前已經有傳佢四圍睇樓，仲鎖定目標係大埔嘅逸瓏灣、鹿茵山莊同比華利山別墅，最終都係揀咗樓齡最新嘅逸瓏灣。
早幾日，藝人陳小春先用超過7,000萬元買入同一座高層A、B室，第時可以做埋鄰居。