將軍澳商場PopCorn竟然遭民建聯「拆招牌」，改為「色情粟米」？事緣該商場上星期有一幅假天花板突然塌下，一個家庭有3人被碎片擊傷，抽水呢家嘢，執輸行頭慘過敗家，民建聯西貢區（廣明選區）區議員莊元苳就喺商場附近貼上海報，促請港鐵同領匯（已易名為領展，兼且個商場唔關領展事囉）立即全面檢查天花板，確保市民安全，但佢繼承民記喺英文方面嘅優良傳統，將PopCorn串做Porncorn，中文意思照譯就係「色情粟米」，認真令人回「味」無窮。
區議員卸責同事
莊元苳截稿前冇回覆八方查詢，但佢回覆其他傳媒時就以「急於印製宣傳單張，忙中有錯」作為解釋原因，稱有關問題已經處理咗，並稱會提醒同事要注意宣傳品內容，唔係想將責任推畀同事啩？有網民衰衰咁話，唔知係咪有人平日喺網上經常搜尋Porn一字，所以將Pop打成Porn呢？
