港大校委今日開會，地點飄浮，一於玩捉迷藏，下列是等埋首副的至佳選擇，抗議者諗吓，港大校委會揀邊度（應該唔使等埋風水佬指點迷津！）
一，星光大道。新世界跟星光大道有感情，九年喎，港大校委對港大百年老店，點止九年情。星光下，大道中，各位右腎和右膝有病的校委，放心開會，新世界睇場，星光照住，等埋李小龍翻生都講得通。
二，電車。任何一輛由金鐘去中環的電車上，是一個二個隨時垂直碌低抱膝叫救命的校委，電車咁慢，救護車一定快過它，如果塞車，救護員跑步都快過電車，校委一定得救，唔怕等埋閻王。
三，般含道。石牆老樹已被移除，個廢墩等車亭有民建聯黨員背書，校委人身必定安全。如果還是驚示威，去坪洲老朴樹下開會吧，聽講有人投訴樹會塌，路政署紮晒馬，試問邊個夠膽接近踩場。
四，灣仔同德押。等埋首副，是一場押注。同德押要拆，港大百年樁腳都要拆。唔順氣？咪讀港大！
五，天津港或者曼谷四面佛。如果校委要呃一萬個like才肯去，市民唔使花63萬公帑，保證一小時達標！