鷹君（041）主席羅嘉瑞近排應該好忙，旗下朗廷酒店進軍中東，喺旺角嘅朗豪酒店又要改名。噚日羅嘉瑞百忙抽空出席同杜拜發展商嘅簽約儀式，全程同杜拜代表密密傾，唔通諗住喺中東搞多幾間酒店？
朗廷酒店集團噚日舉行簽約儀式，同杜拜私人地產發展商Omniyat合作，進軍杜拜市區開設五星級酒店。羅嘉瑞喺活動上透露，尖沙嘴朗廷酒店每逢周末，中國有錢客嘅比例多達50%，好有信心幫Omniyat引入中國豪客到中東玩。
簽完約後，羅嘉瑞就急急腳走人，冇同傳媒分享酒店發展大計。不過，嚟緊星期三朗廷會再搞記者會，宣佈將朗豪酒店改名做康得思（Cordis）酒店；到時，應該好多記者想「野生捕獲」Dr. Lo，問吓佢點解新名嘅強國味咁濃。