曼城狀態真係勇不可擋，禮拜日作客淨勝愛華頓2:0，今季三戰全勝兼冇失波，仲平咗球會超過百年前嘅紀錄，跨季頂級聯賽九連勝！雖然入波嘅係高拉洛夫同埋拿斯尼，但今場最搶鏡嘅係阿古路，因為佢喺比賽中暫停角球，叫救護人員到場邊急救暈低嘅球迷，獲得網民一片讚好。
曼城喺上半場都踢得幾辛苦㗎，攻極都攻唔入愛華頓，直至60分鐘，新加盟嘅史達寧終於做到嘢，喺左路突破後交畀高拉洛夫，後者窄位勁射近柱入網，終於幫曼城開紀錄。之後愛華頓反撲，搶番唔少攻勢，臨尾仲換埋迪路菲奧入嚟搏一搏，但點知換完人冇耐就失多球。88分鐘，耶耶托尼整個瀟灑嘅笠傳，入楔嘅拿斯尼又冷靜，乖巧挑射，笠死愛華頓門將侯活，幫曼城鎖定贏2:0完場。
2:0嗒糖 跨季九連勝
曼城之前贏過西布朗同車路士，今季三連勝，最勁嘅係三場都冇失波，隊長高柏尼啲狀態返晒嚟。睇番數據，計埋上季，曼城已經聯賽九連勝。上次曼城喺頂級聯賽度連贏九場，已經要數到去辛亥革命嗰陣，當時係1912年。由暑假嗰陣盛傳飯碗不保，到𠵱家幫球隊刷新超過100年前嘅紀錄，領隊比歷連尼真係一吐烏氣，佢話球隊吸取咗上季嘅教訓，唔會再輕易喺弱旅身上失分。
阿古路叫停角球救球迷
不過，今場嘅主角係曼城前鋒阿古路，因為佢做咗救人英雄！比賽其間，曼城獲得角球，企喺龍門口嘅阿古路一眼關七，除咗留意對手嘅佈防外，仲睇到龍門口後嘅看台上，有個球迷癲癇症發作，暈低咗。阿古路冇扮睇唔到，即刻揚手叫球證暫停比賽，叫在場嘅醫護人員嗱嗱聲趕去救人，之後位球迷冇乜大礙，但穩陣起見，都係被送去醫院接受檢查。雖然阿古路呢場冇入波，但佢呢吓關心球迷嘅舉動引嚟網民大讚。
阿古路賽後冇邀功，佢喺twitter度話：「我只係做咗一啲普通人都會做嘅事。嗰陣好擔心嗰位球迷出事，好在佢能夠得到及時嘅治理，我希望佢快啲好番。」我求大俠就覺得阿古路真係抵讚，至少好過香港有啲淨係識跟程序辦事嘅人啦。唔少球迷之後都喺阿古路個twitter度留言，包括死敵曼聯嘅球迷都話好欣賞「阿Kun」。