乜嘢叫做禍不單行？新民黨主席葉劉淑儀應該感受最深，明明最初只係想喺facebook貼啲驗腸照抽吓水箒，點知抽出大頭佛，最終爆出助手Eric Chan疑似有鋪偷拍癮，似乎唔夠帶眼識人。政商界梗係關注葉劉有冇因此影響選特首鬥志，但葉劉梗係小小苦楚等於激勵啦，而佢為選特首炮製嘅baby，下月7號就出世嘞，聽聞佢仲拉埋陳智思上船㖭呀！
係人都知，阿爺𠵱家最關注嘅國策，當然包括一帶一路，否則特首梁振英都未必會開口一帶、埋口一路啦！葉劉當然都睇中呢個可以令阿爺另眼相看加分嘅項目，所以早前開始籌備名為「海上絲綢之路協會」。
搞一帶一路搶分
有政商界中人話喎，葉劉四出向唔少「海上絲綢之路」沿線省市嘅在港社團、僑界以及同鄉會等招手，開宗明義係一齊支持中央嘅「一帶一路」策略，為香港嘅未來尋找新機遇，但有政商界就覺得，葉劉呢個組織都係組班行動，事關佢冇乜工商界嘅聯繫，無非都係借助呢個平台，招攬工商界做班底。
八方聽聞，行會成員陳智思應承咗同葉劉一齊擔任為協會聯席主席，點解搵陳智思拍住上？八方有理由懷疑，因為身兼泰國商會主席嘅陳智思出生泰國華僑世家，而泰國都係海上絲綢之路嘅關鍵點，有地膽坐鎮自然好好多。據知協會9月7號喺灣仔會展舉行成立典禮，葉劉有邀請中央相關官員來港；而所屬團體收到邀請，建議當日出席嘅來賓，可以着正裝甚至民族服裝。嘩，乜咁多樣化呀！
李八方
mailto:[email protected]