人稱「洋參大王」嘅恒發洋參（911）主席楊永仁一向多計仔，佢哋舊年推出人參月餅、人參酒後，今年又研發咗隻人參新藥，叫「美肌皂苷素」，仲搵咗近排好hit嘅「沈大師」做代言人。不過，呢位沈大師唔係「燈神」沈振盈，而係靚女沈卓盈。
為大肆宣傳，楊永仁話，公司已經幫新藥同沈卓盈拍咗一輯電視廣告，下個月就會出街；新藥由萬寧獨家發售，每盒賣488蚊，大概食到一個月。至於功效，之唔係都係美肌、補濕嗰類，楊永仁話「自己都成50歲人，自問皮膚都幾好」，證明食人參真係work。
佢又話，中國打貪、防止送禮都影響唔到生意，因為上面啲官同佢講，「送健康畀人，唔會犯法」，啲產品依然廣受歡迎。事實上，公司上半年多賺超過一倍，達4.4億元，難怪「洋參大王」可以咁牙擦。