港台王牌節目《城市論壇》主持謝志峰今年11月退休，噚日佢參與好可能係退休前嘅最後一次幕前演出，為港台一個名為《傘開以後》嘅節目客串一個歌星經理人嘅角色，暫定9月初播出。
《城市論壇》9月重開後，會由人稱蘇B嘅蘇敬恒接任主持，謝志峰話蘇B做咗近10年傳媒，以柔韌見稱，係合適人選，試過採訪時遇星島老闆何柱國開拖，都識得以柔制剛，相信能夠壓得住場，面對維園阿伯發火都唔使驚。下周更會喺港台為蘇B模擬一次城壇運作，等佢熟悉鏡頭走位，令佢更快上手。
謝志峰仲透露，唔少傳媒朋友想搵佢離開港台後開咪，換言之仲有機會同粉絲喺大氣電波相聚。