親中團體「同心護港」噚日天時暑熱都要發起遊行，幾十人喺遮打花園集會後遊行去中聯辦，為乜呢？原來同心護港係唔滿意「政棍、學棍」勾結外國勢力破壞香港喎，佢哋認為基本法23條係保護市民嘅法例，應該要立法。
參與過反佔中行動嘅曹達明，原來係呢個組織召集人，佢斥責本土派同港獨分子揮動龍獅旗，仲點名鬧熱血公民：「撕黨旗啦、嗌打倒共產黨，呢啲都係反中亂港行為。」
特首梁振英話過任內唔會就23條立法㗎噃，咁CY咪失職囉？正常人或者會咁諗嘅，但呢班人嘅知識兼道德水平非一般㗎嘛，所以佢哋冇批評CY，只係話喺發展經濟同時，國家及香港安全更重要喎。