最令人期待嘅畫面，始終無出現，嗚嗚～自從清潔香港@家是香港運動喺特首梁振英一聲令下開展後，唔少司局長已經落區掃地或抹欄杆交差；噚日輪到新任民政事務局局長劉江華出動，返到佢老巢沙田為該區清潔香港活動嘉年華做主禮嘉賓，唔知佢係咪為咗避嫌，冇清潔到當區嘅垃圾桶，令唔少花生友大失所望。
查實唔少傳媒都有問呢位政壇新貴，點解唔好似其他司局長咁抹吓欄先走，劉華冇回應呀，淨係同其他人講拜拜後，登上座駕絕塵而去，呢啲咪叫霸氣囉。假若乜都唔做，CY又唔會放過佢嘅，所以佢都有派吓清潔禮品；而繼董太教人洗手、洗手、洗手後，劉華則同在場醫生笑騎騎一齊示範點樣搓手、搓手、搓手。
嘉年華嘥6萬公帑
呢位沙田友致辭時hardsell一番，話沙田區嘅青少年會為區內冇法團、居民組織同管理公司嘅三無大廈提供清潔服務同探訪長者，傳播清潔訊息之餘又關懷到老人家。
八方現場所見，劉華一走，全場鳥獸散，唔計工作人員，走剩10幾人繼續欣賞嘉年華，全場一排排空凳，相信搞到啲表演者都好無癮。最諷刺嘅係，呢個3粒鐘就用咗6萬蚊公帑嘅嘉年華，使嘅錢同清潔香港根本無關。
八方翻查過資料，開支最大係請人唱歌、跳舞、玩魔術同扮小丑表演，表演者連司儀津貼用咗萬六蚊，單係跳舞表演就有5場咁多。其他錢就用喺搭台、租燈、租凳、租車、發邀請信等，可能呢啲就係家是香港精神，總之活動搞完，沙田乾淨晒啦。
李八方
mailto:[email protected]