何韻詩喺灣仔伊館舉行嘅「十八種香港HOCC」演唱會前晚去到第4場，即場用Skype打咗畀台灣名導侯孝賢，佢隔空同香港人打氣，寄語香港年輕人：「一定要做對的事情，做對的事情，氣就會足，氣足事情就會通；做對的事情，就會有所收穫。」阿詩開心話：「今晚太太太榮幸，隔空連線嘅藝術家係台灣嘅侯孝賢導演，侯導就係侯導，託人聯絡佢，二話不說就爽快答應。」
感激明哥一路相伴
阿詩特別多謝有現身撐場嘅黃耀明，佢眼濕濕咁話：「好感謝好哥哥好夥伴明仔，次次喺台上面見到佢都想喊，多謝你嘅勇敢，有你嘅坦誠至有我嘅反叛。抗爭係需要人陪伴，好彩路上遇到你，最善良嘅你。第日明哥開騷，大家記得要好似對我咁好去對待佢呀！」
另外，毛記電視繼續踩場，得獎歌手係唱《中女羅生門》嘅葉蘊儀，佢唱歌時有啲甩嘴，即刻打圓場：「證明我係唱現場㗎！」
撰文：馮仁昭
