習近平9月3日主持抗戰70周年閱兵，而家係內地頭等大事，所有嘢都要統統讓路，華北經濟停頓，至於股災更不在話下，救唔救市恐怕都無人理會。更有海外媒體指，而家南北韓出現軍事危機，中國又舉行呢種國際性閱兵，耀武揚威，增加咗地緣政治危機，令全球股市跌勢增加。問題係，點解今次閱兵咁緊要？
打個比喻，中共領袖閱兵，類似古代天子登基、封禪，宣告權力合法性與正統性，係頭等大事。例如文革後，華國鋒主政中國五年，係唯一沒有主持閱兵領袖，至今都唔受官方承認曾為領導人。1984年，鄧小平主持首次閱兵，史稱大閱兵，威武雄壯，從此在中國政壇擁有絕對威望。咁樣講，你就明晒喇。
不過今年有小小唔同，因為發生咗天津大爆炸，官方仲要耗費全力去搞呢場閱兵，民間都有唔少怨氣。新華社曾經出過本書，叫《蘇共十年祭》，檢討蘇聯倒台原因，中央曾要求幹部人手一冊，認真刨讀。文中檢討蘇共十大死因，其中一條死罪就係，當年切爾諾貝爾核災難後，蘇共死要面子，要求在附近烏克蘭首都如常舉行五一勞動節閱兵。在輻射塵中，兒童排隊操過廣場，最終導致民眾對蘇共恨之如骨，加快倒台。中共自己都總結都出呢點，當然知道而家搞閱兵的風險。
所以話，抗戰大閱兵碰上天津大爆炸，兩者化學反應驚人，中央而家都好頭痕。股災？小事也。
黃尹華