一田百貨行政總裁（CEO）莊偉忠一向多粉絲，佢淨係提倡返工少開會已經得到唔少打工仔支持，加上佢注重本地客消費，唔會專登遷就做強國人生意，喺港人心目中又加咗唔少分數。
商務及經濟發展局局長蘇錦樑近日指，上月內地訪港旅客跌近一成，跟早前一啲針對內地旅客嘅激烈示威有關，莊偉忠噚日就喺自己facebook以「四個口的高官」為題鬧爆蘇局長。莊偉忠指，「呢個地球，或者香港，有乜嘢可以違反地心吸力物理現象，只會升，唔會跌，有升有跌根本好平常。」佢指，𠵱家當旅客數字下跌，有人就賴三賴四，譴責人哋反抗，賴得就賴。
莊偉忠呢番言論獲得唔少網民認同，好多網民留言讚好，大家對於一田應該又會再多些少好感，可能轉頭就會走去幫襯以表支持嘞。